Швецыя зацікаўлена развіваць супрацоўніцтва з Беларуссю ў будаўнічай галіне
18.06.2020 г.18 чэрвеня на пляцоўцы Нацыянальнага цэнтра маркетынгу і кан'юнктуры цэн адбылася відэаканферэнцыя «Асаблівасці экспарту беларускіх будаўнічых матэрыялаў у Швецыю», арганізаваная НЦМКЦ сумесна з Нацыянальным саветам па гандлю Швецыі і Пасольствам Беларусі ў Стакгольме.
У мерапрыемстве ўзялі ўдзел дырэктар НЦМКЦ Валерый Садоха, Пасол Беларусі ў Швецыі Дзмітрый Мірончык, Пасол Швецыі ў Беларусі Крысціна Юханесан, старшыня Шведскай асацыяцыі гандлю будаўнічымі матэрыяламі Моніка Б'ёрк, эксперты Нацыянальнага савета па гандлю Швецыі, прадстаўнікі больш за 30 беларускіх прадпрыемстваў і арганізацый.
Пасол Дзмітрый Мірончык падкрэсліў, што нягледзячы на негатыўныя тэндэнцыі ў сусветнай эканоміцы, рынак будаўнічых матэрыялаў Швецыі працягвае рост. «Шведскае кіраўніцтва паставіла амбіцыйную мэту пабудаваць 700 тысяч новых кватэр да 2025 года для вырашэння наяўнай праблемы недахопу жылля. Беларускія вокны і секцыйныя гаражныя вароты добра вядомыя ў Скандынавіі. Вясной гэтага года распачаліся пастаўкі беларускай керамічнай пліткі на шведскі рынак. Пэўныя перспектывы таксама ёсць для экспарту цеплаізаляцыйных матэрыялаў і іншай прадукцыі», — адзначыў пасол. Беларускім прадпрыемствам варта больш актыўна праводзіць работу па засваенні новых ніш на еўрапейскім рынку. Дзмітрый Мірончык запрасіў беларускіх экспарцёраў прыняць удзел у міжнароднай будаўнічай выставе «Nordbygg» у Стакгольме ў красавіку 2021 г.
Па словах Монікі Б'ёрк, продажы будматэрыялаў у Швецыі ў I квартале 2020 г. выраслі на 9%, у красавіку — на 14%. Ва ўмовах дыстанцыйнай працы людзі больш часу праводзяць дома, займаюцца рамонтам і будаўніцтвам на сваіх участках. Захоўваецца высокі попыт на імпартную прадукцыю, якая адпавядае высокім экалагічным стандартам.
Падчас відэаканферэнцыі прадстаўнікам беларускіх дзелавых колаў прадстаўлены асноўныя напрамкі праграмы Open Trade Gate Sweden Нацыянальнага савета па гандлю Швецыі, а таксама інфармацыя пра асаблівасці шведскага рынку будаўнічых матэрыялаў, прававых аспектах і патрабаваннях пры экспарце прадукцыі ў Швецыю і краіны Еўрасаюза, аб каналах паставак і аб тым, якой прадукцыі зараз аддаюць перавагу шведскія спажыўцы.
Новыя формы ўзаемадзеяння з бізнесам, у тым ліку відэаканферэнцыі, закліканы спрыяць развіццю міжнароднага гандлёва-эканамічнага супрацоўніцтва.
