Пасол Мірончык зрабіў віншавальны запіс з нагоды 50-годдзя інтранізацыі Яго Вялікасці караля Карла XVI Густава
14.09.2023 г.14 верасня 2023 г. Надзвычайны і Паўнамоцны Пасол Рэспублікі Беларусь у Каралеўстве Швецыя Дзмітрый Мірончык наведаў офіс Маршала Каралеўства і зрабіў віншавальны запіс у сувязі з 50-годдзем узыходжання на трон Яго Вялікасці Караля Карла XVI Густава. 
Кіраўнік беларускай дыпмісіі адзначыў, што за паўстагоддзя з часу інтранізацыі шведскага манарха светапарадак неаднаразова перажываў фундаментальныя змены. Праўленне Карла XVI Густава пачалося ў перыяд разрадкі. 25-годдзе адзначалася на фоне распаду біпалярнай міжнароднай сістэмы. Юбілей жа, на жаль, супаў з беспрэцэдэнтнай з часоў Другой сусветнай вайны эскалацыяй напружанасці. За гэтыя 50 гадоў, будучы па-за якімі-небудзь ваеннымі саюзамі, Швецыя змагла дасягнуць значных поспехаў у сваім развіцці, а таксама садзейнічаць мірнаму вырашэнню канфліктаў далёка за сваімі межамі.
Пасол адзначыў, што гісторыя незалежнай Беларусі налічвае крыху больш за 30 гадоў, але беларускі народ не па чутках ведае, што такое мір і стабільнасць, і менавіта гэтым каштоўнасцям наша краіна надае першараднае значэнне.
Дзмітрый Мірончык выказаў перакананасць у тым, што, нягледзячы на змяненне ваенна-палітычнай парадыгмы Швецыі, Мінск і Стакгольм змогуць захаваць узаемавыгадныя адносіны. «Паколькі маёй галоўнай задачай з'яўляецца садзейнічанне раўнапраўнаму і змястоўнаму дыялогу са Стакгольмам, я спадзяюся, што такі дыялог будзе прадоўжаны і што ўнікальны вопыт нашых краін у садзейнічанні міру наблізіць новую эру разрадкі ў Еўропе», — адзначыў кіраўнік беларускай дыпмісіі.
